Salma al-Shehab dey sentenced to 34 years in prison sake of her tweet
Leeds University don express deep concern for one of dia PhD students wey dey sentenced to 34 years imprisonment for Saudi Arabia sake of her tweets.
Di goment also ban her make she no travel outside Saudi Arabia for 34 years afta her jail term.
Salma al-Shehab wey be 34 year old na Saudi citizen and mother of two.
Dem arrest her for January 2021 wen she dey on holiday for di kingdom on top one tweet she post on Twitter.
Before di trip, she bin call for reforms and di release of activists.
Why Shebab dey face 34 years imprisonment?
Di charges wey di Public Prosecution file against her include "providing help to pipo wey wan disrupt public order and undermine di safety of di general public and stability of di state, she also dey publish false and biased rumours on Twitter," ALQST, one independent human rights organization tok.
One terrorism tribunal convict Shebab say she help dissidents wey wan "disrupt public order" and publish "false rumours", dem tok.
Reactions follow Shebab jail sentence
Human rights groups say di harsh sentence dem give her show say Saudi dey lie wen e tok say dem dey improve women’s rights and di mata only show say di situation dey get worse.
Dem warn say dis na di "longest prison sentence ever for a peaceful activist" for di Gulf state, where Crown Prince Mohammed bin Salman don ensure crackdown on dissent for five years.
Bethany Al-Haidari, di Saudi case manager for di Freedom Initiative, describe di sentence as "abhorrent".
"Saudi Arabia dey boast to di world say dem dey improve women's rights and dey implement legal reforms. But question no dey say wit dis sentence, e only worsen di situation," she told the BBC's Newshour programme on Saturday.
"We don also get reports say hundreds of young women dey detained around di same time dem arrest Salma."
ALQST head of communications Lina al-Hathloul, Loujain al-Hathloul's sister, say di sentence show say Saudi authorities remain "hellbent on harshly punishing anyone wey express dia opinions freely".
"Di release of Loujain al-Hathloul and oda women's rights activists come in response to sustained international pressure. However, as di spotlight on Saudi Arabia has dey fade gradually, di authorities don go back to dia habitual pattern of repression," she tell di BBC.
Di escalation dey "connected to di growing rehabilitation" of Crown Prince Mohammed, Saudi Arabia's de facto ruler, she add.
One month ago US President Joe Biden meet wit di prince forJeddah, even wit di promise to make Saudi Arabia a "pariah" over dia human rights record.