علقت المنتجة سارة الطباخ على أزمة الفنانة شيرين عبدالوهاب الأخيرة ودخولها إلى المستشفى، واتهام «محمد» شقيق شيرين لها وللفنان حسام حبيب بالتسبب في هذه الأزمة.
وقالت خلال مداخلة مع الإعلامي عمرو أديب في برنامج «الحكاية» على قناة إم بي سي مصر، إنها تلقت رسالة من حسام حبيب طليق الفنانة شيرين عبدالوهاب، في الساعة الثالثة فجرًا، بأن شيرين تواجه مشكلة كبيرة.
وأضافت: «بعدها كلمته، قالي إنه بيستغيث إن شيرين اتاخدت من بيت كانت مقيمة فيه عنوة بعد الضرب والسحل وأخذوها بملابس المنزل، بدون حذاء، وإنها مختفية من يوم الخميس».
وتابعت: «قلت له هدخل معايا المستشار ياسر قنطوش لأنه هو المحامي بتاعي وبتاع شيرين، ومش أنا اللي معرفة شيرين على المستشار ياسر، شيرين عرفته عن طريق الفنانة زينة».
وأكملت «الطباخ»: «حسام حكى للمستشار القصة، وقال إنها مختفية من يوم الخميس، وإنه عرف إنها موجودة في مكان ما في مستشفى بالنزهة».
وأوضحت: «رحنا المستشفى في النزهة، عشان نطمن عليها، قالوا لنا مفيش حد موجود بالاسم ده، وتأكدنا إنها داخل المستشفى لكنهم رافضين الاعتراف بذلك، كل هدفي كان الاطمئنان عليها، لو طمنونا كنا هنمشي وتمام».
واستطردت: «حسام قالي إن شيرين أخذت عنوة من المنزل واتضربت واتسحلت من قبل أخوها و10 أشخاص موجودين في البيت، وأخدها على المستشفى من يوم الخميس، شقيق شيرين بيساعد على تشويه صورة شيرين، شيرين ست واعية وقوية».
وكشفت «الطباخ»: «شيرين طيبة وعاطفية جدًا وحساسة لكن متسرعة جدًا، من أطيب وأجدع الناس، وخيرها على الكل وأولهم أخوها محمد».
وأضافت: «ليس لدي أي مشاكل مع شيرين، أنا رحت حبًا فيها وخوفًا عليها، وعايز أطمن عليها، لكن الكلام اللي قيل إمبارح يقلل من شيرين، إحنا كلنا لينا في شيرين».